Hallo und gutä Abä bim erstä Bricht uf dr nöiä Sitä!

Weiss gar nid woni söu afa, ha i dä letschtä Wuchä so vieli tolli Sachä erläbt! Also ganz als erst isch sicher mal z Wätter dran, das isch nämlech im Momänt sensationell, i bi tatsächlech afangs Wuchä im T-Shirt umä gloffä! Ke Luft würklech eifach Frühlig oder besser gseit scho fasch ä chli Summer... Aber alles het mal äs Ändi und so isches ou mitem schönä Wätter in Vancouver, am Wuchäänd wots doch tatsächlech wieder cho rägnä und cho schneiä! Ja so isches hiä halt, di Iheimischä sägä derä schönä Stadt nid für nüt "Raincouver"! Ir Schuel louft folgendes, letscht Friti isch wieder mal alles gwächslet und gmischlet wordä. Ändlech bini di längwiligi Grammer-Lehrerin los, das isch würklech ä Naturkatastrophä gsi (sowohl im unterrichtä wie ou vom usgseh här). Wenn ja Grammer ufem Programm steit isch mä nid grad sehr motiviert id Schuel z ga, aber machä muesches halt, aber bi derä Lehrerin isches würklech no mal 10 Stufä längwiliger gsi! I ha de eigentlech ou dänkt dasi nid so beliebt birä bi, will i ha ja mit derä nid einisch ir Pousä oder so chli gredet - was ja bi dä angerä Lehrär gang und gäbe isch. Die machä immer mit üs Pousä und de wird gschwätz über Vancouver und was nis grad interessiert oder was grad aktuells passiert isch. Äbä zrüg zu derä "Tam" (das isch dr passend Namä no zu derä Person) Friti churz vor Schluss hets wie immer d Zügniss gä und i ha mr da dä Umständ entsprächend nid z viel erhofft - Chasch dänkä, genau angers isches gsi, überall hani Hervorragend ka (Ufgabä, Integrierä, Mitmachä etc.) und bi doch tatsächlech iz Level 4B ufgstigä! Ja so chamesech tüschä - jetzt isches mi lieblings Lehrerin, nenei das de doch nid grad! Am Samsti heimer de ä witeri sehr gueti Kollegin müssä/dörfä verabschidä, si geit mitärä andere Kollegin no ä Monet z Amerika go umäreisä bevors de wieder zrüg id Schwiz geit, ja so geit das hiä, öper geit und öper chunt, immer chli ä Wächsel! Ja witer hani ja am Samsti no Geburtstag ka und das heimer natürlech chli gfieret.  Am Abä siemer im Roxy gsi, das isch ä guetä Club mit live Musig und so. Astah für inä hetmä öpä 1,5 Stund müssä - dänksch würklech dasi das gmacht ha??? Ja mal agfangä aber de hets de spöter Löösli für alli "Astehndi" gä wo Nümmerli si druf gsi, wär z passende het ka - mit däm wo isch zogä wordä het fürä chönä und inä. Jep tatsächlech das het passt! Ig ä anderä Schwizer (woni bim astah ha kennä glert) und no ä Holländer heinis grad zämä gleit und si innä - suberi Sach! Witer isch am Sunndi de d Party bir Homestay Family dähei witer gangä. Das isch gloub so üblech dasme bi inä darf Kollegä iladä wenn mä Geburtstag het und si für eim düä Chochä... Si het mi de am Donnsti ou gfrag wasi gärn z Ässä möcht? Quiz: --> Äs het sächs Buchstabe, mi issts mit speziellä Gablä, isch liecht gälblech und wird ou irä speziellä Pfannä kochet - genau FONDUE ha ni mir gwünscht. Wow, si isch natürlech us alnä Wulchä keit und mr sofort ires Fondueset präsentiert - has ja paar Wuchä vorhär scho imnä Schrank gfundä, drum hani ja ou gwüsst dasis cha mache :-) Am Friti isch isch si de ufä gross Ichouf und woni am Obä bi vor Schuel hei cho isch da Salat, Fleisch, Rahm, Gmües, Champignon und Frücht im Kühlschrank gsi und alles agschribä mit "Sunday" ?!?!? Woni genaur luege gseni das nüm nur eis Fondueset sonder jetzt drü umästöh??? I ha ja nid gwüsst wi Mängi Tonnä Fondue was si wot machä aber bi de natürelch sofort go nachä Fragä: Also d Situation am Sunndiabä isch so gsi: Äs het normals Chäsfondue gä (wi gwünscht), drzue hets aber ou no Fondue Chinoise gä, mit Fleisch, Gmües und Champignon zum asteckä, und ou no grünä Salat mit Croutons, Tomatä und verschiedänä Chärnä drin... Das wär mal dr erst Gang gsi! Äs isch würklech absolut dr Hammer gsi und äs het im ganzä Huus so guet nach "Heimat" gschmöckt! Gang Nr. 2 isch ufem Programm gstandä, äs witers Fondue! (Eis Set isch ja no nid brucht wordä...) Das isch scho langsam iz Dessärt inä gangä: Äs het äs "Ahornsirup-Cremä-Fondue" gä womä Melonä, Erdbeeri, Bananä oder Kiwi het chönä drin tümpflä, läck mir isch das guet gsi, das Rezäpt muesi no grad ha! Nachdäm mir ou dä Gangä hei gnossä ka isches de witer gangä zum Houpt-Dessärt: Geburtstagsturtä und zwar hani mr ä Schoggiturtä gwünscht, ke ahnig wiemer das no hei achä brocht aber äs isch uf jedä Fall dr Hammer gsi. Ja i gloubä die Geburtstags-Fondue-Party wirdi nie me vergässä, isch würklech genial gsi und d Homestay Eltärä hei säch so nä riesä müh gä - wow! Am Mänti isch de Schuelfrei gsi, wi immer wenn di nöiä Studäntä chömä... Das isch so richtig dr Erholigstag nach drüt Täg Party gsi (am Friti nämlech ou scho...) I ha lang Usgschlofä, de bini chli iz Fitness, am Vieri hani im Kafi abgmacht ka, am sibini bini hei go Znacht ässä, de no chli Fernseh gluegt und wieder iz Bett - Perfekt! A am Samsti dürä Tag isch ja perfekt Wätter gsi und den bini nomal a English Bay gangä und rund umä Stanley Park gloffä, si also über 10 Kilometer! Isch so schön gsi, Strand, Sunnä hami grad chli gfühlt wi z Hawaii... D Phöteli wärdes bewiesä! Witer bini am Mittwuch vorärä Wuchä im Vancouver Aquarium gsi, wahsinnig diä Fischä, Qullä, Schlangä, Affä und vieles meh! Witer heimer dört ä Bellugä-Wal Show gseh, di Ficher heis doch Tatsächlech gschaft iz Publikum usä Wasser z sprützä - und de nid weni, paar si also plotsch nass gsi! Ä halb Stund sp?¿½¿½¶ter het ou no d Delphin Show statt gfundä, ou diä isch ganz guet gsi, di Tierli hei uf z Wort gfolget, ou vo dört hets paar Phöteli und sogar no ä Film!

Guet guet das wär im Momänt öpä so z nöischtä was bi mir louft, vom Arbeitsvisum hani bis jetzt no nüt kört mäldemi sobald i öpis weiss, öb posivit oder negativ... Hebet ä guete Tag und bis zum nöchstä Mal!

Liebi Grüess - ADRIAN