gutä obä zämä

wi loufts bi euch, siter dr frühlig und z wüsch dürä no chli dr schnee am gniesse? i möchte am fränzi und am patrick vo bärn a derä stell no mal ganz härzlech dankä sägä für di risä mängi schwizer schoggi wosi mir gschickt hei – ir sit di gröschtä! DANKÄ VIELMAL !!!!!!!!!!!!!!!!!!!!!!!!!!!!!! i ha jedi mängi z verzellä: fa mal mit öpis luschtigem a woni im fitnes ha erläbt: i bi im fitness gsi ganz normal, ha z schäftli mitä chleider und so abbschlossä, aber dert hesch ja kes schloss dran sondern das nimsch sälber vo dähimä mit. also so äs chlises mitemne schlüssel, ha i zum bispiel. äbä i ha bschlossä, bi 2 stund go tranierä, chumä zrüg und wot z züg zum duschä usä nä und de git das schloss nüm uf. ha ifach dä schlüssel nüm inä bracht. ha als erst mal alli schäfftli müssä dürä luege öbs überhupt mis isch... (isch äs grosses fitness centre, also da si immer öpä 15 lüt am anders allegä) --> sehr pinläch wenn muesch go gugä wo dis züg i bschlossä hesch… also witer, isch tatsächlech mis gsi aber het ifach näd passt. ja was hani welä??? i bi de a d’reception go fragä öpsi öpis chönä machä ?!?!? de nimmt dä ä risä staalschäri fürä, aber risig und het mr das schloss müsä cho ufbrächä, so peinlich!! aber houptsach offä und i ha mini chleider und so wieder. und das isch o näd zerstmal gsi wo das passiert isch (d schlösser z vancouver si älwä näd so guet) will das diä grad im fitnesscenter so nä schärri hei het mi scho chli verwunderet. ja das si so schöni sachä woder blibä – jetzt chani drüber lachä, ha ja näd müsä nackt hei loufä… witer bini lescht wuchäänd z victoria gsi. das ligt ganz südlech uf vancouver island. mir si am samsti am morgä am 09.00 im downtown vancouver gstartet, zerst isches mitem bus richtig flughafä gangä, dört heimer müsä umstigä und am 10.45 simer z tsawwassen am fähri terminal acho. das isch de ou relativ guet ufgängä wüu am 11.00 simer de ou scho abgfahrä. di fährä isch also riesig gsi, 6 stöckig! wobi zwöi stöck für outos si reserviert gsi. aber würklech genial, internet terminals, äs grosses restaurant, verschiedeni lädä, terassä, alles hets dört ka. dämentsprächend hei mir de ou üsi fahrt nach swartz bay sehr gnosse. witer isches de no mal ä stund mitem bus bis victoria downtown gangä. Mir si alserst grad go z hotäl suchä, will mir no ä person meh si gsi als mr reserviert hei ka. Isch also absolut kes problem gsi und z hotäl het ou einigermassä guet usgseh (für 23.- / nacht darfsch ja nid z viel erwartä!) am namittag heimer d stadt agluegt, z parlaments gebäude, und natürlech di vilä schönä bluemä wos würklech überall het ka. mir si de ines tai-restaurant go z nachtässä, i ha so nä ries-schalä ka mit poulet, gmües und so zügs. nachem ässä simer no mal zrüg zum parlaments gebäude, das düsi ja ir nacht u schön belüchtä und lescht samsti womer äbä si dört gsi isch so nä kanadischä oder vielicht amerikanischä (i weises nid) strom-spar-abä gsi. am achti heisi alli öffentlichä gebäude und staats-hüser dunkel gmacht, da isch natürlech z parlaments gebäude z victoria ou drbi gsi und tatsächlech am punkt achti isches im dunklä gsi. mir si de öpis go trinkä und am nüni heisi de wieder belüchtet. ja und so heimer de dä obä no la usklinkä und irgendwenn um mitternacht simer de zrüg iz hotäl. Mir hei tatsächläch z dritt äs zimmer für 6 personä ka… am sunndi simer de als erst richtig go zmorgä ässä, so mit fruchtsalat, toast, joghurt und orangäsaft. anschliessend simer no am strand nachä gloffä und im nobel viertel, di hei natürlech alli blick uf z’meer, würklech hammer schöni hüsli, so eis heti sofort gno! am eis heimer de dr bus gno richtig butscharts garden. das isch dä berümt gartä mit dä vielä blumä. am zwöi simer de dört ou tatsächlech acho, das isch ä super schöni fahrt gsi, quer dür z züg dürä, da hesch mal richtig kanada gseh, mitä risigä farmä, dä wunderschönä grossä fälder – eifach hammer. ja und de simer am igang vo däm gartä gsi, dr itritt isch also türer gsi als z hotäl… mir si da sälbverständlech inä und hei scho nid schlächt gstunet. wahnsinnig wi gepflegt und suber das isch (im gägäsatz zum räscht vo kanada woni bis jetzt afang ha gseh) mir si no grad ä chli früh gnue gsi vor jahreszit här, i dänkä im summer mues das no viel schöner si. Aber äs het ou jetzt scho jede menge blumä ka wos z bewundärä het gä, bsunders d’tulpä si richtig saison gsi. de isch alles so i verschidäni teilä ufteilt gsi, unter anderem dr japanais gartä – dä isch ganz edel gsi aber ou dört wo alles chli wild isch gsi und mitz drin wieder ä springbrunnä und schöni tulpä betli. alles in allem würklech ä wunderschönä gardä wo ganz sicher mitämnä risä ufwand verbundä isch und dr relativ höch pris rächtfertiget… nachdäm mir de no öpis hei trunkä dört isches de zrüg zur bushaltästell gangä und üsä bus isch paar minutä speter ou scho cho. zu üsem erstunä het dr chauffeur genau gwüsst dasmer uf d füfi fährä wei und mir hei ou nid schlät glosst woner gseit heit dases ihm nid immer längt für uf d fährä und si halt mängisch scho abgfahrä isch, ja mir hei n’ihm de uf english müsä klar machä daser halt mall chli mues gas gä und mir di füfi fährä also undbedingt no müsä verwütschä. das het ou tiptop klappet und dä isch tatsächlech scho am 16.40 am swartz bay itroffä – einisch meh simer wunderschön mitz dür d natur vo kanada gfahrä, eimalig! ja womer de uf dr fährä si gsi isch mr klar wortä dasi nid eifach so dr ganz tag - usert bim zmorge - ke appetit ha ka sonder i ha richtig chalt und buchweh übercho. Mit müh und not bini de nach füf stund ou no dähei acho – mit über 39 grad fieber… ja schuel isch fürem mänti afang mal gstrichä gsi, ha de chli ä wüschti nacht ka so mit erbrächä und so und bi de dr ganz mänti würklech flach im bett glägä. ha brav teeli trunkä und mi schön dähei still ka und am zisti abä isches de ou scho wieder besser gangä und am mittwuch hani wieder chönä d schuel bank drückä. Wahrschinlech isch dr tai food am samsti abä nid ganz i ornig gsi, wüu am sunndi woni bi ufgstandä het säch mi buch scho chli komisch agfühlt, ja no das giz halt mängisch… halb so schlimm! trotzdäm isch das äs würklech wunderschöns wuchäänd gsi wo mr erläbt hei… ja das isch im momänt alles woni grad ha z verzellä,  a ja am sundi geit ä gueti kollegin hei, resp. no chli z amerika go umä reisä, si het jetzt no z visum übercho, ja und si fröit säch natürlech risig gli wieder i di schöni schwiz zrüg z ga… schad geit si scho aber bi mir geits ja ou nüm al zu lang und de chani ou vo vancouver wäg, no sibä wuchä wenn alles klappet !!!! 

liebä gruess - ADRIAN