Halli Hallo alli zämä! 

Wi geitsnäch i däm schönä Frühligs-Wätter? I ha grad chli mitärä Grippä z kämpfä, also nid tragisch eifach chli Chopfweh, Halsweh und wasmä halt albä so het. Aber im Bett bini zum Glück nid eifach chli „schlapp“ aber due jetzt brav Teeli trinkä und hoffä dases uf z Wuchäänd wieder guet isch… Ja äs isch scho bau lang här woni di letschtä Zilä ha gschribä, aber bi haut ou füu ungerwägs. Ha a zwöi ganz schönä Ortä z Vancouver dr Phöteler nid drbi ka, mini Kollegä hei aber gfötelet und i hoffä das de d Photos irgendwen ir nöchstä Zit einisch iträffä. Also mal chli zrüg: A däm Wuchäänd woni dr Zopf ha gmacht simer am Sunndi no so imnä Park gsi womä ä wunderschöni Ussicht uf z Meer und ufä Lüchtturm het ka. Z Wätter isch den ä chli bewölkt gsi und darum si d Phöteli nid ganz so schön cho wi ni mirs erhofft ha. Jano äs cha nid immer klappä. Letscht Wuchä d Schuel isch ganz normal gsi, am Friti nachtürlech no i jeder Klass Phöteli wüu ja am Mänti alles nöi gmischlet isch wordä. (d Japaner müsä doch zeigä mit wäm dasi alles id Schuel si…)  Am Friti simmer de no richtig i Usang und zwar simer ir Cambie Bar gsi, isch tip top dört. Mir si eifach chli viel Lüt gsi (15 Stück!!). Womer si innä gsi hets paarnä nid passt und hei witer welä. I und dr Brasiliä Kolleg hei gseit mir blibä da wüu Fritiabä hesch ninä ä Chancä zum hockä und überall ussä muesch astah bis a Bach achä, also wenn mal innä bisch de blibsch eifach und geisch usä wenn dä hei wosch! Ja und das het de när ou klappet, si tatsächlech nur zwöi witter gangä und mir hei ä super Abä dört innä verbrocht. Am Samstinamittag simer so imnä riesä Gartä gsi mit Labyrinth und wunderschönä Blumä. Ändi März isch dört no Orchideä-Usstellig (gäl Mam !!) und da hani dänkt göngi de o no paar Phöteli go machä. Das isch äbä das einä Mal woni d Kamera nid drbi ha ka… Am Samstiabä bini no im Chino gsi, zum Glück het dr Film sehr viel Aktion ka, wüu ganz ehrlech gseit, wie d Gschicht isch gangä oder dr Film gheissä het weisi leider nüme, das isch grad chli z fescht english gsi für mi. Ha scho chli öpis verstandä aber isch sehr schwirig gsi. Am Sunndiabä bini mit paarnä vor Schuel go japanisch ässä. Isch o senasationell gsi, aber z koreanischä hets nid mögä übertrumpfä. Äs isch chli zweni scharf gsi oder  isch älwä eifach nid scharf, drfür hetmä no unkochti Eier i di chalti Saucä da und de d Nüdeli drin gschwänkt, ja sehr speziell. Was dr Hammer isch gsi: Womer si innä cho heimer alli müsä d Schuhä abziehä und de ischmä wärendem ganzä Ässä im Schniedersitz da ghocket resp. d Frouä knöilet. Aber isch super gsi, wasi da wieder als komisches mit denä Stäbli ha gässä (di hani de im Griff!): Entä i irgendämnä Öl, Tintäfischringli wo nach Chäs hei gschmöckt, allerlei Seetierli, Gmües i X Variationä und natürlech viel viel Riiiiiiiiiiiiiis! Has sehr gnosse. Diä Wuchä hani im nöiä Level agfangä, das wär jetzt 3b. Ja immerhin, geit emel geng chli witer. Jetzt hani nur no Grammatik und Hören/Verstehen/Sprechen, das isch jetzt chli stränger ha rächt viel meh Huusufgabä und z Tempo ir Klass isch enorm höch. Aber isch guet, so geit d Zit schnäll verbi und i lehrä viel. Guet vilicht chani ja no chli lenger ir Schuel blibä will dases mitem schaffä klappet gloub „I“ langsam aber sicher nüme: Ha doch tatsächlech hüt am Namittag äs Mail übercho und zum drittä mal z Visumsgsuech usgfüllt, mitlerwilä chanis afang ganz guet! (Z estä Mal isch am 17.August 2007 gsi !!) Kostets hets bim drittä mal chli meh, wil si hei älwä überä Jahreswächsel d Prisä erhöit (Momentan isch dr Kurs bi rund 102 Euro / Mal) I hoffä schwär für d Frou z Solothurn das si alles richtig macht, langsam chunt mr das ganzä afang chli komisch vor. Und vor allem si angeri Schwizer da wo mit däm verd...tä Visum si igreisst! Ei Chancä gits ja no und das isch das Couvert wo id Schwiz ungerwägs isch, aber i weis nid wi das wot funktionierä. Bearbeitigszit in Paris isch rund 12 Wuchä , bis dä Brief ir Schwiz isch heimer ganz sicher Friti de mues z Büro z Solothurn no dr Sänf drzue gäh und nach Paris schickä. Dänkä mal im bestä Fall isch das ändi nöchst Wuchä dert, de geits rund 12 Wuchä und de isch öpä Mitti Juni und i theoretisch scho drü Wuchä am schaffä. E mir wärdes gseh, duenech ufem loufende haltä! Witer gani Morn zum Xtä mal im Büro vor Jobvermittlig verbi, ou da hets änderigä gäh, wils dä Schwizerbehördä irgendwie nid passt. Da weisi aber no nid meh, ga ja erst morn verbi… I gloubä di wei mi eifach nid la schaffä da, binä älwä z unsympathisch ??? So i wünschä Euch alnä ganz ä schöni Ostärä, gniessets und lueget das er ou alli Eier findet !!

Hebet ä schöni Ostärä!

Liebä Gruess - ADRIAN