Guete Abä zämä! 

Als erst weti am Vreni vo Beitiwil no ganz härzlech zum Geburtstag gratulirä! Sorry hani kes Mail gschribä, dürä Tag hani no dra dänkt und am Obä woni dähei bi gsi nüme! Im nachhinäin no alles Guete und viel Glück!  Wi geits, wi steits?Schön dass ihr mi nöischt Brief läset! Langsam weisi nüm was schribe ?!?!?!?!? Nenei, ha no viel uf Lager und erläbä ja jedi Wuchä wieder nöi i Sachä: Letscht Samsti si dr Barry (Homestay Vater), d Maki und I go wandärä. Das isch los gangä am Samsti nachem Mittag und zwar sie mir öpä ä halb Stund mitem Outo irgendwo uchä gfahrä, de simer 1.5 Stund quer dürä Wald anä wunderschönä Ussichtispunkt glofe. Ufem Wäg derthärä hani sehr viel glert, dr Barry het früecher so Wandertourä mit Hotelgest in Vancouver gmacht. Är isch diä go abholä mitem Outo im Hotäl isch den irgendwo id Bärgä uchä gfahrä, het mitnäh ä wanderig gmacht und viel über d Natur, d Bäum und Vancouver verzellt. Wenn si obä si gsi heternä ä Lunch ?ir freiä Natur? (isch älwä für Touristä hiä öpis ganz verruckts?) gmacht. Ufem Heiwäg heternä albä Fragä gstellt (Sachä woner vorher erklärt het) und wärs alserst gwüsst het, het äs Sugus übercho. Und für das hei di Touristä jede Menge Gäld härä gleit. Jetzt machter das nüme wiler drmit zweni verdient het und er nüm lenger ä eigeti Firma het welä (ischim z streng gsi) i säges ja di Kanadier schaffä eifach nid so gärn zvil! Uf jedä Fall letscht Samsti heter das wieder einisch gmacht mit üs ? eifach ohni Lunch ? will mir hei üses Zvieri sälber im Rucksack nachätragä. Ufem Wäg dert uchä hanimi sehr amüsiert ab dr Maki, si het wiessi Turnschuhä an ka (also Wiess si si mal gsi) will am forder Tag hets no grägnet und dr Wäg isch zum Teil sehr pflutschig gsi. Süsch heimers würklech lustig ka ufem Wäg dert uchä, i ha dr Barry no niä so locker und gmüetlech erläbt. Vo obä hetmä de ä wunderschöni Ussicht über z Meer ka diräkt uf z Metrotown Center wo mitem Bus rund 60 Minutä entfernt isch. Nachdäm mir üses Zvieri hei gässä ka und fertig gphötelet hei kah, isches de ufä Heiwäg gangä und d z?Fragä Spiel isch inä witeri Rundi gangä? De simer hei go duschä. Angers agleit und id Stadt. I ha mit 5 Klassäkameradä abgmacht ka und d Maki hani grad mit gnoh, si isch ja z erstä Wuchäänd hiä gsi und i ha dänkt das wär grad gueti Müglechkeit für paar Lüt z kennä lehrä. Mir si de ou am sibni pünktlech dört gsi und hei eigentlech inäs Brasilianisches Restaurant wellä. Leider hei mir aber de nid reserviert ka und so hets kes Plätzli mehr für üs frei ka. Mir si de witer iz Jesters ar Dunsmuirstreet aber ou do - alles usbuechet. Mir si de no eis witer und hei de ändlech ä Platz imnä tip topä Restaurant gfundä. I ha Pasta ka arä Tomatäsauce mit Zuchetti, Tomatä, Aubergine, Pouletsteifä und ämnä Toastbrötli obä druf. Sensationell isches gsi! Nachem ässä heimer no inä Nachtclub wellä, leider hei aber zwöi d ID nid drbi ka und da hesch z Kanada ke chancä, da darfsch nid mal inä und äs Mineral drinkä, nei du wirsch scho am Igang wieder hei gschickt. So hei mir de dä gmüetlech obä im Starbucks Kafi witer gnosse und hei änanger Röibergschichte vo 4 verschidänä Länder verzellt bis am Morgä am Eis. Isch so genial gsi, scho numä mit där Händ uf Zäh (10) zelä machtmä i allnä Länder angers? Da gits sehr viel z lachä, d Variantä vo dä Japaner isch am lustigstä: Di düä vo 6 ? 9 d Finger uf di Flachi Hand ha (Bsp. 8 isch di Flachi Hand und 3 Finger, ohni Dumä und Chlifinger) Witer hani hüt ä Zopf gmacht! Das wär ja nid so schwirig, has ja schliessläch zwöi Jahr lang glert. Aber wo d Homestay Mum d Zutatä het heibracht hani grad chli Buchweh übercho. Hefe isch so imnä Doktor A.Vogel ? Kalktablettä Bächerli gsi, z Mehl het gschmöckt wi di Pastä wodä bruchsch zum chleistärä ir Schuel (äs het g fischelet!). D Margarinä isch gsalzä gsi, git hiä nüt angers. Und für z Salz hetsimr dr Salzstreuer vom Tisch gäh? Aber nüt desto trotz hani agfangä und zerst nachärä Waag gfragt. Nüt gsi gits i üsem Hus nur für Personnä? Päch gsi, hani halt das ganzä gschetzt. Nach Rund 10 Minutä hani de dä Teig ou tatsächlech zämä ka und nä la garä. Und tatsächlech nachere Stund ischer ufgangä, i hets niä gloubt. I ha de mit zöpflä agfangä und de isches los gangä, d Maki, d Michelle (Homestay Mum) alli mit dr Digitalcamera am phötälä und Kurzfilmli dräiä. Di hei fasch nid chönä gloubä dasmä sälber cha äs Brot machä und das Brot ou no so komisch inänang inä geit??? Ja bsunders d Michelle het risä freud ka a däm Zopf. Jetzt muesi no grad öpis angers schribä: und zwar geits um d Margä vor Milch und vom Joghurt und angerne Milchprodukt: di isch doch tatsächlech ?lucerne? und wo das diä Stadt ir Schwiz isch wüssä ja gloub alli? ?lucerne? - Produkt si überigens chli di bessärä als di normalä ? JA, mir hei ja schlissläch ou di bessere Chüä ir Schwiz! Bilder vo dä Zutatä und vom End-Produkt hets sälbverständlech ou.  Morn Sundi wüssemer no nid genau was mr wei machä, wil z Wätter isch wieder mal nid so dr Hammer, mir hei am 13.00 im Blenz-Kafi abgmacht und de luegemer de was nis gluschtet. 3D Chino wär no ä gueti Variantä tönt doch vielversprächend? Diä Nacht müesemer ou no d Uhrä fürä stellä uf d Summerzit und so hei mir jetzt de ä Zitdifferenz vo nur no 8 Stund. 

Wünschenech allnä ä ganz gueti Wuchä und äs würd mi freuä öpis vo euch z körä! 

Liebe Gruess - ADRIAN