Saaaali mitenand! 

Wi läbeder so ir Schwiz? I has hiä z Vancouver wunderbar, ha sehr ä guet i Wuchä ka mit dä erstä English erfolgä: I bi iz Level 2A ufgstigä… vo üser Afänger-Klass si de das also nur zwöi gsi wo si witter cho - und öper dervo bi i gsi! Am Mänti wird also alles wieder nöi gmischlet und di Lüt woni bis jetzt ir Klass ha kennt, gseni nur no i dä Pousänä. Isch ou guet, de lehri wieder nöi i Personä kennä und das isch doch ou schön. Witer hani diä Wuchä äs Interview mitem Arbeitsvermittler ka, das isch sage und schreibe ä ganzi Stund gangä, natürlech alles uf english. Aber äs isch gangä, bi einzälnä Fragä woni nid verstandä ha heimernis mit Häng und Füess verständiget und dr Räscht isch würklech guet gsi. Är het säch ou sehr mühä gä, het sehr dütlech gredet etc. Dä het ou welä züg wüssä: Näbschtem schaffä, woni i Usgang göig, was mini Hobbies sigä, wasi hiä z Vancouver scho alles gmacht ha, wini d Schuel findä, etc. etc. etc. Jetzt sucht är für mi ä Job (Rockies oder Whistler…!!!) und wener öpis het lütet dr Chef vo däm Hotel/Restaurant mir a und de gseh mä de was dä meint… Am letschtä Zischti isches hiä wunderbar Wätter gsi und das hani voll und ganz usgnützt: I bi nach dr Schuel diräkt mitem Seabus (Fähre) vom Downtown nach North Vancouver gfahrä, dört hets äs wunderschöns Restaurant und ä Ussichtsplatz, diräkt näbem Terminal vom Seabus. I bi dört öpä am Füfi gsi und ha ä wunderschönä Sunnäungergang erläbt, würklech 1A! Z Meer, im Hingergrund d Stadt, wunderbar, muesch de d Phöteli luege. Am Friti nach dr Schuel bi i und zwöi Schwizer Kolleginä (Mir hei no öper meh kennä glert wo usem schöntstä und süberstä Land vor Wält chunt) i Metrotown. Das isch z grösstä Shoppingcenter wos hiä z Vancouver git. Mir si zwe Stund dört umägloffä (und kouft) und hei no lang nid alles gseh ka. Wahrschinläch ca. 1/3 will im Unger und im Ober Stock simer nur ganz schnäll gsi, würklech extrem GROSS. Für Frouä ä Troum à eii Schuh- und Chleiderladä nachem anger… Am Samsti simer ufem „Lookout“ gsi. Das isch ä 181 Meter grossä Ussichtsturm, mitz in Vancouver. Das isch würklech guet gsi, i rund 30 Sekundä bisch mitem Lift obä gsi. Mit eim Studäntä-Ticket hesch dr ganz Tag uchä chönä, mir si nachem Mittag z erstmal, bi Sunnäschin. De ca. am Füfi bim Sunnäundergang und i bi de am Achti mitem letscht Lift no einisch uchä, für Vancouver ir Nacht z phötälä, und das het säch würklech glohnt, äs isch so schön gsi dert obä, di Liechter eifach dr Hammer, da gani ganz sicher no einisch. Obä innä hets no äs Restaurant ka.  Mir hei dänkt sig eifach so nä Beiz womä öpis cha drinkä - ist nicht so: Mir si i ober Stock, de isch da dr Empfang gsi (isch z Canada ganz normal) „Hello, only for drink, please!“ Mir si anä Tisch gführt wordä und de lueg i mi so umä und merkä erst dass das äuä eis vo dä nobelstä Restaurant z Vancouver isch. Mir si i normalä Freizit Jaggänä dört gsi und a dä angere Tischä heisi alli wissi Hemli, Cravattä etc. an ka. D Frouä hei chum chönä loufä wüu si so ängi Minis und so höchi Absätz bi dä Schuh hei ka (und wahrschinläch no ä Tonnä Schminki im Gsicht). Halb so wild,  mir si dört würklech super behandlet wordä (obwohl mir nur öpis hei trunkä) und i gloubä dr Källner dört obä het z erst mal i sim Läbä bim schaffä dörfä lachä… Di hei säch risä Müh gäh. Z Cola mit Ice und Limettäschnitz imnä wunderschönä Glas het eifach de 8.- Dollar kostet - aber das isches uf jedä Fall dr wärt gsi… A ja äs Fitnesscenter hani ou gfundä, ou super fündlechi Lüt dört, hälfä eim zeigä, sägä, wimernis vor Schwiz här gwöhnt si! Isch würklech super hiä Stundänt z si: I ha für zwöi Mönet zahlt und ei Monet isch gratis - a das Studäntä Läbä chönt mäh säch würklech no gwöhnä. Das ganzä isch eifach ä „chli“ grösser als ir Schwiz aber äs het ou viel meh Lüt dört, bruchts scho… (Het 24h am Tag offä – jetzt chani no am Morgä am zwöi go trainierä, und das a zäh verschidänä Ortä in ganz Vancouver…)  Sola, für nöchst Wuchä steit näbst Training folgendes ufem Programm: Am Mänti Schuelfrei (da di nöiä Studäntä chömä, alli Lehrer müsä denn Interviews mit denä machä, wi bi mir am erstä Tag). Darum gani hüt mitämnä Koreaner ufä Grouse Mountain go snöbä, ke ahnig öb dä scho mal ufemnä Brätt isch gstangä aber i wirdes gseh, wird sicher lustig… Am Zischti geit de d Schuel im Level 2 los und de chunt scho gli z Wuchäänd und uf das föiemi scho jetzt: Mir göh am Samsti az Weltcup Rennä uf Whistler !! Samsti Morgä am achti fahremer ab… Isch alles scho reserviert und zahlt, müsä nur no istigä. Isch extrem billig – mir göh nid mit dr Schuel sonder mit Greyhound, diä wo scho z Canada umägreisst si kennä dä sicher. Das chostet für härä und zrüg nur 26.- Dollar und si doch im ganzä über 5 Stund Bus fahrä… I freuemi, meh dr vo wirdi de schribä weni dört bi gsi! 

Also wünschä Euch allnä witerhin viel Spass bi däm schönä Wätter ir Schwiz, (wini kört ha...) bi üs chunts ou langsam guet mit derä Sunnä… 

Liebi Grüess - ADRIAN