Hello my friends,

Jetzt muesi dä ganz Text no enisch schirbä will i vergässä ha z spichärä vorem Znacht ässä, shit happens... Jäh, sälber Schuld wär nid gschid gnue isch sis züg z absichere machts haut no mau: Also, hiä z Vancouver isch vom Wätter här immer no alles genau glich wenn nid no schlimmer, äs rägnet und rägnet und rägnet und rägnet... I bi hüt tatsächlech ä Rägäschirm go choufä (Das isch z aller erst mal i mim Läbä wo i ä "Eigätä" Rägäschirm besitzä) Isch das nid schön? Nei äs isch würklech schlimm, pisst vom Morgä bis am Abä... Und i wet doch so gärn chli Sunnä. Damt i eini vo denä drei Sunnäbrillä woni ha mitgno chönt alegä... Am Wuchäänd het mirä Homestay-Mum iri Mueter Geburtstag ka, das isch ä risä Party gsi im Hus, so richtig mit Ässä und so und i ha da ou voll dörfä mitmachä, ha wieder viel nöi i Lüt kennä glert, gret so guets isch gangä und s eifach lustig ka. Zum Ässä hets alles Sachä gäh wo mir ou kennä usser öpis isch sehr speziell gsi: Broccoli Salat. Isch eigentlech nüt usergwöhnlechs (meinä us jedem Gmüs bringt mäh irgendwiä ä Salat härä) aber dä isch roh gsi !! I ha tatsächlech UNKOCHTÄ Broccoli Salat gässä!! Tönt würklech komisch isch aber gar nid so schlächt, halt eifach sehr knackig... I gloubä ds heisi hiä z Vancouver allgemein, bir Family, ir Stadt überall wohni mal ha Gmües gässä isches nid weich gsi. Süsch z Ässä isch eigentlech relativ guet. Zum Glück luegt mi Family sehr uf gsundi Ernährig (weni Fett, viel Gmües und Frücht etc.) Bini scho sehr froh, will nach paar Wuchä Hamburger, Hot Dog und Pommes frites chasch mi zrüg röuälä... Äs isch so nä Mischig zwüschä Amerikanischem Ässä und Schwizer Ässä, da äs hiä relativ viel Japaner het gits ou sehr viel gsundi Sachä und nid nur dä Fast-Food-Ramsch vomä vom McDonalds här kennt. Witer isch am Wuchäänd ou no "Chines New Year Party" gsi, das isch so nä Art Fasnachtsumzug, eifach mit Chinesischer Musig und Verchleidig. I bi dört mit 5 witärä Klassäkamerädli härä gangä und äs isch würklech no lustig gsi zum luege (Photos). Wieso das d Chinesä New Year 9./10. Februar firä weis i bis jetzt aber immer no ned (vilicht chamer ja öper witer hälfä) Isch emel guet gsi, user dases wärend em ganz Umzug grägnet het... (denn hani no ke Schirm ka)Am Friti bini ou zerst mal ir Nacht ir Stadt gsi -das isch scho Hammer schön di vilä Liechter würklech sehr speziell! So jetzt woti de no go dusche, de no chli Fernseh luege und de öpä mal id Fädärä... Morn woti goluege öps da äs Fitnesscenter het (also äs het öpä 10) aber i mues mal go luegä wi diä dört so fustä... (Gäu Mischu :-) > Athena, Rächerswil)

No schnäu ä Zitverglich: Mir hei 11.02.2008 @ 20:24 und ir heit 12.02.2008 @ 05:24

He also sit lieb zunenang and see you!

Liebi Grüess - ADRIAN