Ä wunderschönä guete Tag!

... Äs isch so wit i findä wieder mal Zyt ä paar Zielä uf mirä Homepage z schirbä! Ha die letscht und diä Wuchä grad chli viel um d Ohrä ka, bsunders ir Schuel. Mir hei Grammer- und Wörtlitests ka, viel Ufgabä und zum Abschluss no ä Vortrag über d Geographie vo Canada. Hüt isches jetzt so wit gsi und dä 20 Minütig Vortrag isch über d Bühni. Isch eigentlech nid so schlächt gangä, i ha ä gueti PowerPoint Präsentation ka wo mi sehr guet het understützt. De hani vieli schöni Bildli zeigt. Als Abschluss hani no äs wundrschöns Winterbild zeigt, ha de da drus no sonä Art Quiz gmacht und d Frag drzue isch ganz eifach gsi: I welärä Stadt oder i welem Dorf isch das Bild? Ja d Antwortä sie üsserst Kreativ gsi: Whistler, Montreal, Vancouver, ha alles kört... Nei nüt vo allem isches gsi, sondern äs isch äs Phöteli vo Adelbodä gsi, Switzerland! Ja und so isch dä Vortrag relativ lustig z Änd gangä (bsunders dr Lehrer hets fasch nid chönä gloubä, dass imnä Kanada Vortrag äs Phöteli vor Schwiz zeigt wird).

So jetzt mal ä Wuchä zrüg: I ha ja per E-Mail mis Work Visa vor zwöi Wuchä übercho, Mission II vo däm ganz Zouber isch gsi das Visa i Pass inä z übercho und das isch folgender Massä gangä: I ha ä Kolleg kennä glert vor Schwiz wo z genau glichä "Problem" het ka. Perfekt, mir hei de ä Telefon Nr. übercho vorä Frouä in Vancouer wo üs heti zur Gränzä achä gfahrä und ou wieder zrüg. Dr Pries für dä ganz Gspass isch pro Person 125.- Dollar gsi. Het dr Kolleg und mi grad chli viel dünkt, für das Gäld chöimer ja zwöit äs Taxi vom Downtown zur Gränzä und wieder zrüg näh. Ja so sie mr am Donnsti nachem Mittag sälber gstartet. Mir hei dr Bus gno wo irä Stund und 25 Minutä bis Vier Kilometer vor d Gränzä isch gfahrä (isch di aller letschti Station gsi) Vo dört hani de äs Taxi bstellt wo üs bis vor d Gränzä het bracht, mir sie de wie Flüchtlinge mit je ämnä Rucksack am Rüggä zur Amerikanischä Gränzä "vordrungä". Ja när isches los gangä, sälbvertändlech als erst hetmä müsä Fingerabdrück gä, de Formular usfüllä und när isches mit dä Fragä los gangä. Mir hei das natürlech vorhär alles genau besprochä und so isch de "Shopping in Seattle" ou relativ guet acho bi däm Zollbeamtä. Är hetsäch de no drfür interessiert was mr so wei choufä und ou da "z nöiä Apple I-Phone" het passt. De aber luegt er uf d Uhr und seit: Ja ir sit chi spät dran, mir hei scho Namittag am Vieri. Jep jetzt bini im Scheiss gsi. I ha de gseit dasmer hüt nur wei go luege wos isch und öb mit dä Päss alles i.O. isch und das mir de nöchst Wuchä mit Kollegä "richtig" gö go Ichoufä. Ja und siehe da ou das heter gloubt (also öber das würklech gloubt het oder nid weisi ja nid) aber mir hei uf jedä Fall gägä d Gebühr vo 6 Amerikanischä Dollar dä schön Stämpfel übercho! Guet, ersti Hürdä nach rund 30 Minutä gschafft. Mir hei de z Fuess ä schönä Bogä um denä ires "Hüsli" gmacht und si diräkt wieder inä a di Kanadischi Gränzä. Dört hetmä zerst mal müsä 30 Minutä wartä, het Usgseh als würdä diä das üsserst Exakt machä. Ja und so isches de o gsi, übernä Stund heter brucht für zwöi Mal äs Arbeitsvisum i Pass inä z mechä, und natürlech Fragä und Fragä und Fragä und zwüsch dürä wieder wartä und de wieder Fragä und so wieter und so fort. Öpä am halbi Sächsi heters de ändlech gschaft ka und mir hei wieder am Taxi aglütä wo üs zur Busstation het bracht und vo dört mitem Bus wieder hei. Kostet hetnis das pro Person mit Taxi genau 12.50! Am Abä am Achti bini de todmüed aber glücklech dähei acho.

Am Friti isch normal Schuel gsi und när isch ja scho Wuchäänd gsi, wow - uf das hanimi scho äs Zitli gfreut, resp. ou chli nervös gsi. Wieso? Also am Samstiabä bini am 20.00 iz Bett und ha gschlafä. - Isch das nid sehr ufregend? Nei isches nid! Also, i bi nämlech am Sunndi scho am Vieri am Morgä ufstandä und zwar für folgendes: I ha am Vancouver Marathon mitgmacht !! Richtig, 42.2 Kilometer joggä, rennä, loufä, humplä oder schnaggä eifach unger 6 Stund! Also i bi äbä am vieri Ufgstandä, ha Zmörgelet - äs het Spaghetti gä, ohni Sauce, drfür ä rächti Portion! (Rächt hässlech am Morgä früh!) De am Füfi isch mis Taxi cho - woni am Vorabä ha bstellt - wo mi de zur nöchstä Skytrain Station het brocht (Busä si denn äbä no nid in Betrieb). Mitem Skytrain bini de wunderbar am 6.00 im B.C. Place Stadion itroffe wo das ganzä isch los gangä. Zerst hani afang mal nur gstunet wieviel Lüt das da si, äs sie tatsächlech rund 13.000 gsi wo hei mitgmacht. De hanimi parat gmacht, z Ruckseckli abgäh, z Start Nr. und dr Chip (wo Zyt elektroisch misst) montiert und mi a Start bewegt. Ja usä isches rächt chalt gsi, am Morgä am 7.30 wos isch los gangä bi 10°C. Ja und de bini bi schöntstem Wätter quer dür d Stadt gsprungä. D Strecki isch alserst paar Kilometer im Downtown gsi, de richtig UBS, zrüg i Downtwon, Gastown, Stanylepark, English Bay, wieder zrüg i Downtown, UBS dasmal aber bis fasch z hingerst hinägrä und de zrüg zum B.C. Place Stadion wo z Ziel isch gsi. Die erstä 35 Kilometer sie wunderbar gangä, ha schön mis Tempo ka, z Wätter isch guet gsi, hesches richtig chönä gniesse. Ab Kilometer 36 het das de aber realtiv schnäll abgnoh, da säch langsam hei Chrämpf i dä Oberschänkel la bemerkbar machä. Ja das isch de vo Kilometer zu Kilometer schlimmer wordä. De isch no dr letscht Ufstieg über d Burrard Bridge bevor gsi, dä isch natürlech no so richtig z Horror-Dessärt bevor mä de iz Ziel chunt. Totmüed, d Füess gspürsch nüme würklech aber überglücklech bisch. Genau 3 Stund und 52 Minutä hani für die rund 42 Kilometer brucht. Das isch absolut tip top für mi, bi 931ist wordä vo denä rund 3000 wo dr Voll Marathon hei mitgamacht. (Frouä und Männer) Ir Hallä innä hets de Tonnäwies z'Ässä gä (falls das me das het welä) Ja, die meistä heisäch so mit chli Frücht und vielicht mitämnä Joghurt oder ärä Bouillon wieder chli fit gmacht. Ja när isch no chli Party gsi dört (für diä wo no nid si gnue müed gsi) und Siegerehrig für di 10 Bestä und am 15.00 isch de das ganzä fertig gsi. Ha de no mit Kollegä im Blenz Kafi abgmacht ka, das hani no gnosse und de bini hei, go schlafä - sensationelli 14 Stund! Das het guet da und so bini geistig wieder 100% Fit gsi für am Mänti id Schuel. Z loufä am Mänti het de einiges herter ka, ha also d Füess rächt gspürt, bsunders bim Stäggä-Achä-Loufä, aber äs git ja da in Vancouver überall Liftä - zum Glück...

So das wär das woni di letschtä zwöi Wuchä so erläbt ha! Hoffä ir gniesst z schönä Wätter ir Schwiz (wini ha körä sägä) ?!? I uf jedä Fall scho denn mir hei ou fasch immer schön... No zwöi Wuchä bini jetzt z Vancouver und de wirdi de id Rockies züglä! Bis gli...

Liebi Grüess - ADRIAN